Re: [ELiSo] UEA liberigis siajn gazetarajn komunikojn

Saluton! Gratulon pro tiu laŭdinda iniciato kaj sukceso! Alpublikaj komunikistoj, kutimiĝintaj je la aŭtomata ĵurnalista licenco por informado pri aktualaj eventoj, ĝenerale ankoraŭ ne konscias pri la utileco de publikigo de siaj komunikoj sub eksplicita libera permesilo. Antaŭ kelkaj jaroj mi aranĝis la samon en la Masaryk-Universitato kaj tie ĝi bone funkcias. Ĉu ekzistas iu centra loko, kie oni trovu: - kaj arkivon de ĉiuj tiuj gazetaraj komunikoj de UEA - kaj klaran deklaron pri ilia disponigo sub konkreta libera permesilo ? Ekzisto de tia loko estas grava kaj por ĉiu enmetema vikipediisto/vikifontaristo, kaj por ĉiu alia kiu deziros kontroli la asertatan aŭtorrajtan staton, kaj por iu ajn alia kiu povus reuzi la komunikon laŭ libera permesilo ankaŭ ekster la vikimediaj projektoj. Mi rigardis nur al https://uea.org/aktuale/komunikoj kaj tie mi ankoraŭ neniun informon pri disponeblo sub libera permesilo trovas. Supozeble tiu tamen estas la loko kie tia informo aperu. Ideale ja la informo pri libera permesilo (ideale per la internacie komprenebla bildeto, alklakebla cele al la teksto de la koncerna permesilo) aŭtomate aperu tie sub la teksto de ĉiu unuopa gazetara komuniko – por ke trovinte ĝin ĉu gugle, ĉu per la ligilo en informkesto vikifontara, oni tuj povu la permesilan informon vidi/kontroli. Sen klara kaj publike alirebla deklaro, la uzeblo de la GK-j sub libera permesilo estos limigita aŭ eĉ nula. Alternative eblus tion aranĝi per unufoja alsendo de letero el UEA en la OTRS-n – tiel mi siatempe aranĝis pri liberigo de fonto sekve uzita dum verkado de la ĉeĥa vikipedia artikolo pri Esperanto, vidu ĉe https://cs.wikipedia.org/wiki/Diskuse:Esperanto#Svolen%C3%AD_dr%C5%BEitel%C… – sed tio farus la tuton multe malpli facile malkovebra kaj trarigardebla. Mi do sugestas iri la unuan vojon, kaj supozas ke io tia ja verŝajne ĉiukaze jam survojas. Rilate Vikidatumojn, mi sugestas krei eron "gazetara komuniko de UEA" kaj igi ĉiun unuopan GK-n ĝia instanco. Siavice tiu ĝenerala ero estu subklaso de la nun uzata "gazetara komuniko". Tia aranĝo estonte ebligos pli facilan serĉadon de GK-j de UEA, en la ĝeneralan eron eblos transmeti iujn informojn validajn por ĉiuj komunikoj (kiel ekzemple eldonisto aŭ adreso de ilia reta arkivo) ks. En la ekzempla vikidatumero mi forigis la propraĵon P407 (ĉar ĝi laŭ sia priskribo estas ĉe tekstoj eksmoda). Mi ankaŭ sugestas forigi P2699 ("URL"), kongrue kun la instrukcioj en ĝia priskribo, favore al uzo de nur P953 ("plena teksto atingeblas je"). Indus ankaŭ indiki nur unu URL-adreson, se ili ambaŭ direktas samloken – la retejestro de UEA decidu, ĉu la "mallonga ligilo" estas "persista ligilo" (do pli longdaŭra ol la longa) aŭ male "porokaza ligilo" (celata al momenta uzo, utila pro sia mallongeco, sed neniel garantiata) kaj sekve oni elektu laŭe. Fine, preskaŭ jam forsendinte ĉi tion, mi rimarkis verŝajne gravan detalon: Laŭ indiko ĉe la ekzempla GK, ĝia teksto disponeblas sub permesilo CC BY versio 4.0. Tamen, en la kolofono de Vikifontaro, oni indikas ke ĝia enhavo disponeblas sub CC BY-SA versio 3.0. Ĝenerale estas tiel, ke la vikimediaj projektoj uzas version 3.0, krom Komunejo kiu akceptas ankaŭ dosierojn sub 4.0, kaj krom Vikinovaĵoj kiu ial daŭre restas ĉe 2.5. Grava rimarko estas, ke tiuj permesiloj estas ja antaŭen-, sed ne retro-kongruaj(!) Ĉiu CC-permesilo ebligas reuzon laŭ "pli nova versio", sed aliflanke tio ne eblas – ĉar la kondiĉoj de 4.0 estas "pli modernaj", reuzanto ne rajtas mem decidi reveni al "pli malnovaj", "malpli evoluintaj" kondiĉoj de iu malpli alta versio, kaj pludistribui la verkon tiel. Sekve, mi forte rekomendas, ke UEA ĉu distribuadu la tekstojn sub CC versio 3.0 (kvankam tio plu ne kongruos kun Vikinovaĵoj), ĉu eĉ 2.5 (se vere necesus kongrui kun Vikinovaĵoj), ĉu eventuale sub triobla permesilo (ĉiuj 2.5, 3.0 kaj 4.0). En la menciita universitato oni post konsultiĝo kun juristo decidis disponigadi sub 3.0 kun eksplicita plano iam laŭ bontrovo de la disponiganto transiri al 4.0 (legu: kiam Vikipedio pretos je tio). Transiro al 4.0 ĉe la teksta enhavo de vikimediaj projektoj ja daŭre ankoraŭ ne okazis. Amike, Marek Je 4.10.2018 21:13, KuboF Hromoslav skribis: https://eo.wikisource.org/wiki/Vikipedio_en_Esperanto_atingas_sian_250-mila… https://www.wikidata.org/wiki/Q56878009 _______________________________________________ Dissendolisto de ELiSo ELiSo(a)lists.wikimedia.org https://lists.wikimedia.org/mailman/listinfo/eliso