Kara Cindy,
ni Esperantlingvaj vikimedianoj kore dankas al vi pro via donaco al la
Vikimedia movado kaj pro la atesto de via admiro kaj praktika uzado de
la vikimediaj projektoj, aparte la Vikipedio en Esperanto.
Certe via konfeso ĝojigos ankaŭ ĉiujn volontulajn vikipediistojn, kiuj
aktive partoprenas en konstruado de la Vikipedio en Esperanto. Kaj ĉar
ofte ni devas defendi nian propran ekzistokialon fronte al kritiko – kiu
ankoraŭ pli ardas en la vikimedia mondo, kie jam temas ankaŭ pri
distribuo de financaj rimedoj por aktive subteni la kreskon de projektoj
– mi certas ke ni pli aŭ malpli frue trovos tre konkretan uzon por via
atesto ankaŭ en la subtena laboro kiun la grupo ELiSo faras. Unu tian
sukceson, en kiu tiaj atestoj de niaj legantoj tre gravis (kaj ni tiam
ankoraŭ nur nebule sciis paroli, ĉar ni apenaŭ iujn havis!), ni jam
faris antaŭ ne tiom longa tempo – eble vi legis pri la decido de Asaf
Bartov pri la ne-plua malpermeso de vikimediaj subvencioj por
artefaritaj lingvoj:
https://meta.wikimedia.org/wiki/Grants_talk:PEG/KuboF_-_Esperanto_kaj_Liber…
Amike, dankante al vi ankaŭ nome de ĉiuj gekolegoj, salutas vin
Marek Blahuš (Vikipediisto:Blahma)
Je 2014-08-06 16:44, Cindy McKee skribis:
Pardonon, sed mi volas entrudi en la liston dum
momento, nur por sendi
komenton.
Mi ne estas vikipediisto, sed mi ĉiam admiris vin.
Hodiaŭ mi donacis embarase etan kvanton al Vikimedio. Fakte, mi ja estis
embarasita. Do, mi decidis enmeti en la informilon la kialon por mia
donaco. Sed la paĝo malaperis.
Do, mi decidis rekte mesaĝi vin:
Mi povas uzi Vikipedion anglalingve. Sed tio, kvankam utilega, donas la
informon laŭ unu vidpunkto. Kiam mi alklakas la ligilon por la
esperantlingva artikolo, mi ricevas, ofte, tiun artikolon laŭ malsama
vidpunkto, malsama vidmaniero. Tio helpas min prijuĝi la informojn kaj
donas al mi pli kompletan bildon de la temo.
Dankon pro tio.
p.s. Mi neniam subtenis la ideon pri esperanta Vikipedio nur cele al
propagando. Mi ne estas flirtanto de la esperanta flago. Sed tio, kion
vi faras iĝas ĉiam pli altkvalita kaj vere utila al mi kiam mi serĉas
informojn. Pro tio, mi dankas vin.