Re: [Wikiml-l] Noteworthy Wikimedian Recognition

എനിക്കും സുനിലിന്റെ അഭിപ്രായം തന്നെയാണുള്ളതു്. ഞാൻ സ്വയം കരുതുന്നതു് വിക്കിപീഡിയ എന്റെ സ്വന്തമാണെന്നാണു്. പക്ഷേ, എന്നേക്കാൾ എത്രയോ മടങ്ങുകൂടുതൽ വിക്കിപീഡിയയെ ആത്മാർത്ഥമായും പ്രതീക്ഷാനിർഭരമായും സ്നേഹിക്കുന്ന, മുമ്പെങ്ങോ അതിനുവേണ്ടി അഹോരാത്രം അദ്ധ്വാനിച്ചിട്ടുള്ള / ഇപ്പോളും അദ്ദ്വാനിച്ചുകൊണ്ടിരിക്കുന്ന നൂറുകണക്കിനോ ആയിരക്കണക്കിനോ ആളുകൾ ഉള്ളതുകൊണ്ടുമാത്രം എനിക്കും വിക്കിയുടെ പിൻ‌വരിയിൽത്തന്നെയേ സ്ഥാനമുള്ളൂ എന്നും ഞാൻ കരുതുന്നു. വിക്കിപീഡിയയിലെ ‘ശ്രദ്ധേയരായ‘ ഉപയോക്താക്കൾ ആരാണെന്നു് എങ്ങനെ അളന്നുനോക്കും? അതിനുള്ള scale of measure എന്താണു്? സമയത്തിലൂടെ ഒഴുകിക്കൊണ്ടിരിക്കുന്ന ഒരു നദിയാണു് വിക്കിപീഡിയ. ഒരിക്കൽ ഒരു കൊച്ചരുവിയായിരുന്നു. ഇനിയും എത്രയോ വളർന്നു് ഒരു മഹാനദിയായിത്തീരേണ്ടതുമാണു്. (ഇംഗ്ലീഷ് / മലയാളം) വിക്കിപീഡിയയുടെ ജനനം മുതൽ അതിന്റെ കരയ്ക്കു് സാകൂതം നോക്കിനിന്നിരുന്ന ഒരു കാണി എന്ന നിലയിൽ മാത്രം പറയട്ടെ, ഒഴുകിക്കൊണ്ടിരിക്കുന്ന ഒരു നദിയിലെ ഏറ്റവും മനോഹരമായ ദൃശ്യം ഏതെന്നു് എങ്ങനെ കണ്ടുപിടിക്കും? മലയാളം വിക്കിയെ സംബന്ധിച്ചിടത്തോളം, ഇക്കഴിഞ്ഞ വർഷങ്ങളിൽ പല ഉപയോക്താക്കളും അത്യന്തം സജീവമായിരിക്കുകയും അവരുടെ രാപകൽ മുഴുവൻ വിക്കിക്കു വേണ്ടി അദ്ധ്വാനിക്കുകയും ചെയ്തിട്ടുണ്ടു്. അവരിൽ പലരും പിന്നീട് തീരെ സജീവമല്ലാതെ തുടരുകയോ നിശ്ശേഷം വിക്കിയിൽ നിന്നും അകന്നുപോവുകയോ ഉണ്ടായിട്ടുണ്ടു്. അവർക്കൊക്കെ അംഗീകാരം ആരു കൊടുക്കും? ഇന്നു് വിക്കിപീഡിയയിൽ ആവേശപൂർവ്വം പങ്കെടുക്കുന്നവർ നാളെയും ഇതേ നിലയിൽ, ഇതേ തോതിൽ അവരുടെ സംഭാവനകൾ തുടർന്നു നൽകിക്കൊള്ളണമെന്നില്ല. വിക്കിപീഡിയയിൽ എഡിറ്റ് ചെയ്യുന്നതു മാത്രമാവണമെന്നില്ല വിക്കിപീഡിയയുടെ പുരോഗതിയ്ക്കുവേണ്ടി ഒരാൾക്കു ചെയ്യാനാവുക. വിക്കിയെക്കുറിച്ച് പൊതുസമൂഹത്തിൽ നിരന്തരം പറഞ്ഞുകൊണ്ടിരിക്കുക, വിക്കിപീഡിയ നിരന്തരം *വായിക്കാൻ* അവരെ പ്രേരിപ്പിക്കുക ഇതെല്ലാം ഒരിക്കലും നമുക്കളന്നെടുക്കാനാവാത്ത സംഭാവനകളാണു്. അത്തരക്കാരെ നാം എങ്ങനെ കണ്ടുപിടിക്കും? അതുകൊണ്ടു് അഥവാ വിക്കിപീഡിയ / വിക്കിമീഡിയ അത്തരത്തിലുള്ള എന്തെങ്കിലും അംഗീകാരം ആർക്കെങ്കിലും കൊടുക്കുന്നുണ്ടെങ്കിൽ (വിക്കി എഡിറ്റിങ്ങിന്റെ മാനദണ്ഡങ്ങൾ മാത്രം വെച്ചാണെങ്കിൽ പോലും) ചുരുങ്ങിയ പക്ഷം അതൊരു Space/ Time Frame-ൽ പെടുത്തി വേണം. ഉദാഹരണത്തിനു് 2010-2011ലെ ഏറ്റവും ശ്രദ്ധേയനായ മലയാളം വിക്കികളിലെ ഉപയോക്താവു്. അതുപോലെ, ഓരോ ഇൻഡിൿഭാഷകളിലേയും തനതായ ഉപയോക്താവു്. അതും ഓരോ വർഷത്തിനും തനതായതു്. ഇംഗ്ലീഷ് വിക്കിയുടെ ഇന്ത്യൻ ഉപയോക്താക്കൾക്കും ഇങ്ങനെ ഓരോ വർഷത്തിനും ആകാവുന്നതാണു്. (പക്ഷേ, ആരൊക്കെയാണു് ഇന്ത്യൻ ഉപയോക്താക്കൾ എന്നു് എങ്ങനെ തീരുമാനിക്കും? പ്രവാസികൾ ഇതിൽ പെടുമോ?) നിലവിലുള്ള സിസോപ്പ്, ബ്യൂറോക്രാറ്റ് തുടങ്ങിയ ‘പദവി’കൾ എന്തെങ്കിലും തരത്തിലുള്ള അധികാരങ്ങളല്ല, പ്രത്യുത ഉത്തരവാദിത്തങ്ങളാണു് ഒരു ഉപയോക്താവിനു നൽകുന്നതെന്നു് ഞാൻ പരിപൂർണ്ണമായും വിശ്വസിക്കുന്നു. ഇത്രയും എന്റെ വ്യക്തിപരവും സ്വതന്ത്രവുമായ അഭിപ്രായമാണു്. -വിശ്വം 2011/11/9 സുനിൽ (Sunil) <vssun9(a)gmail.com> _______________________________________________ Wikiml-l is the mailing list for Malayalam Wikimedia Projects email: Wikiml-l(a)lists.wikimedia.org Website: https://lists.wikimedia.org/mailman/listinfo/wikiml-l