അതിൽ ഒരെണ്ണം ഫോണ്ടുകളുടെ തെരഞ്ഞെടുപ്പുതന്നെയാണു്. വലിയ കുഴപ്പമില്ലാതെ പ്രവർത്തിച്ചിരുന്ന, വല്ലപ്പോഴും എനേബിൾ ചെയ്തു് ഭംഗിയായി ഉപയോഗിച്ചിരുന്ന, മീരയുടെ ഏതോ വേർഷൻ സിസ്റ്റത്തിൽ നിന്നു ഡീലിറ്റു ചെയ്തു് http://wiki.smc.org.in/Fontsൽ നിന്നും ലഭ്യമായ എല്ലാ ഫോണ്ടുകളും പുതുതായി ഡൗൺലോഡ് ചെയ്തു് ഇൻസ്റ്റാൾ ചെയ്തപ്പോൾ ചില്ലുകൾ ഇല്ലാതിരിക്കുകയും സ്വതവേയുള്ള വലുപ്പം കുറയുകയും ഉണ്ടായി. അതിനുശേഷം, Windows Character Map, Font Explorer, Fontforge എന്നിവയിൽ ഈ വേർഷൻ ഫോണ്ടുകൾ നോക്കിയപ്പോൾ അവയ്ക്കു് ന്യൂനതകളുള്ളതായി അനുഭവപ്പെട്ടു. http://wiki.smc.org.in/Fonts എന്ന ഫോൾഡറിലുള്ളതു തന്നെയാണോ മീരയുടേയും മറ്റും ഏറ്റവും പുതിയ വേർഷനുകളെന്നു് സന്തോഷ് തോട്ടിങ്ങലിനോടു് നേരിട്ടന്വേഷിച്ചപ്പോൾ, അദ്ദേഹം SMCയുടെ വേറൊരു ഡെവലപ്മെന്റ് ഫോൾഡർ (http://download.savannah.gnu.org/releases/smc/fonts/malayalam-fonts-5.0.1/Meera/) കാണിച്ചു. ആ വേർഷനിൽ ആണവചില്ലുകൾ അതാതിന്റെ തനതു കോഡ്സ്പേസിൽ ഉണ്ടായിരുന്നു താനും. അതായത് ഈ രണ്ടു ഫോൾഡറിലുള്ള ഫോണ്ട് വേർഷനുകളും വ്യത്യസ്തമായിരുന്നു!

ഇതിനുപുറമേ, വിക്കിപീഡിയയുടെ സാമാന്യതത്വശാസ്ത്രവും നയവും ULS സ്ഥാപിക്കപ്പെട്ട രീതിയിൽ ലംഘിക്കപ്പെട്ടു എന്നു പറയേണ്ടി വരും. ലോഗിൻ ചെയ്യാത്ത ഒരു ഉപയോക്താവിനും വിക്കിപീഡിയ വായിക്കാനും തിരുത്തുവാനുമുള്ള മൗലികസ്വാതന്ത്ര്യമുണ്ടു്. അവനു്/അവൾക്കു് വിക്കിപീഡിയയ്ക്കുപുറത്തു് മലയാളത്തിൽ വായിക്കാനുതകുന്ന സ്വന്തം താല്പര്യത്തിനനുസരിച്ചുള്ള ഒരു ഫോണ്ട് ഉണ്ടാകാം. സാങ്കേതികമായി അവൻ(ൾ) വിദഗ്ദനോ(യോ) അല്ലാത്തവനോ(ളോ) ആയിരിക്കാം. അതു പരിഗണിക്കാതെത്തന്നെ, ആ ഫോണ്ട് ഉപയോഗിച്ചുതന്നെ, വിക്കിപീഡിയയും വായിക്കാൻ/ (വേണമെങ്കിൽ തിരുത്താനും) സാധിക്കണം. ഏതെങ്കിലും ഒരു ഫോണ്ടിനു് മുൻഗണന കൊടുക്കുന്നതു് പക്ഷപാതപരമാണു്.