അങ്ങനെയല്ല.  പ്രധാന എന്നു തന്നെയാണു മൂലപദം.  അതു പ്രധാനം ആകുന്നു എന്നേ ഉള്ളൂ.  പ്രധാന+മന്ത്രി ആണു പ്രധാനമന്ത്രി.  ലോപസന്ധിയല്ല.

1950-കള്‍ക്കു മുമ്പേ മലയാളത്തില്‍ സംസ്കൃതം പോലെ വാക്കുകള്‍ ചേര്‍ത്തെഴുതുന്ന സമ്പ്രദായം ഉണ്ടായിരുന്നു.  "ഇങ്ങനെയിരിക്കുമ്പോളച്യുതനൊന്നു പറഞ്ഞു" എന്നും മറ്റും.  എന്‍. വി. കൃഷ്ണവാര്യരും മറ്റുമാണു് അതു് അഭംഗിയാണെന്നും വാക്കുകള്‍ വേര്‍തിരിച്ചെഴുതുകയാണു മലയാളത്തിനു നല്ലതെന്നും പറഞ്ഞതു്. "ഇങ്ങനെ ഇരിക്കുമ്പോള്‍ അച്യുതന്‍ ഒന്നു പറഞ്ഞു" എന്നേ ഇപ്പോള്‍ പറയാറുള്ളൂ.

"പ്രധാന വസ്തുത" തുടങ്ങിയവയുടെയും സ്ഥിതി ഇതു തന്നെ.  "പ്രധാനമന്ത്രി" പോലെ ചേര്‍ന്നു നിന്നാല്‍ പ്രത്യേക അര്‍ത്ഥമുള്ള സമസ്തപദങ്ങളൊഴികെയുള്ളവ വേര്‍തിരിച്ചു തന്നെ എഴുതണം എന്നതാണു പുതിയ രീതി.  വന്‍, മുന്‍, തന്‍ തുടങ്ങിയ ഭാഗികരൂപങ്ങള്‍ ചേര്‍ത്തു തന്നെയാണു് എഴുതുന്നതു്.   പദ്യത്തിലും ഇങ്ങനെ തന്നെയാണു് എഴുതുന്നതു്.

ചേര്‍ത്തെഴുതുന്നതു് തെറ്റെന്നു പറയാനാവില്ല.  മലയാളത്തില്‍ അങ്ങനെ ഉപയോഗിച്ചിരുന്നതാണു്.  എങ്കിലും ഇതാണു ഭംഗി എന്നാണു് എന്റെ അഭിപ്രായം.

വിക്കിപീഡിയയിലേയ്ക്കു വാക്കുകള്‍ പരിഭാഷപ്പെടുത്തുമ്പോഴും ഇതു ശ്രദ്ധിക്കണം എന്നാണു് എന്റെ അഭിപ്രായം ("ശ്രദ്ധിക്കണമെന്നാണെന്റെയഭിപ്രായം" :) )  പലപ്പോഴും ഇംഗ്ലീഷിലുള്ള ഒറ്റ വാക്കിനു മലയാളത്തില്‍ ഒറ്റ വാക്കു വേണമെന്നു ശഠിക്കരുതു്.  അപ്പോഴാണു കടിച്ചാല്‍ പൊട്ടാത്ത സംസ്കൃതപദങ്ങളുടെ പുറകേ പോകേണ്ടി വരുന്നതു്.  New page എന്നതിനു "പുതിയ താള്‍" മതി, "നൂതനപൃഷ്ഠം" വേണ്ട.  Unbreakeable-നു "പൊട്ടിക്കാന്‍ പറ്റാത്തതു്" മതി, "നിര്‍ഭേദ്യം" വേണ്ട.

അതു പോലെ, മലയാളത്തില്‍ സമസ്തപദങ്ങള്‍ ഉപയോഗിക്കാം എന്ന വസ്തുതയും കണക്കിലെടുക്കണം.  Industrial revolution-ല്‍ -al ഉള്ളതു കൊണ്ടു് നമ്മള്‍ "വ്യാവസായികവിപ്ലവം" (വ്യവസായ + ഇകം = വൈയവസായികം ആണെന്നതു മറ്റൊരു കാര്യം) എന്നു പറയണ്ട.  "വ്യവസായവിപ്ലവം" എന്നു മതി.  സമസ്തപദം ഇംഗ്ലീഷില്‍ അഭംഗിയായതുകൊണ്ടു് (ഇപ്പോള്‍ ഉണ്ടു്) സായിപ്പിനു് -al ചേര്‍ക്കണമായിരുന്നു.  നമ്മള്‍ ഇകവും ഈയവുമൊന്നും ആവശ്യമില്ലാതെ പൂശണ്ട.

പിന്നെ, നല്ല വാക്കുകള്‍ കണ്ടുപിടിക്കാന്‍ ഞാന്‍ വളരെ മോശമാണു്.  അതുകൊണ്ടാണു് അങ്ങനെയുള്ള ചോദ്യങ്ങള്‍ക്കു പലപ്പോഴും ഉത്തരം പറയാത്തതു്.  പല നിര്‍ദ്ദേശങ്ങള്‍ വരുമ്പോള്‍ അഭിപ്രായം പറയുക മാത്രമേ ചെയ്യുന്നുള്ളൂ.




--
Umesh Nair