O雨話叫我解解經，咁我盡力而為啦。

話說大概公元前大概1400年，當時嘅以色列係一個遊牧民族，喺埃及尼羅河三角洲一帶出沒。埃及立咗一個新皇帝，呢個皇帝同以色列族人反咗面，搞完一輪大龍鳳（史稱「十災」）之後以色列族全族撤出埃及。

佢哋走呀走，過埋紅海（即係所謂嘅「摩西分紅海」）之後，喺以色列南部個沙漠度遊蕩。班友諗起以前住喺埃及嘅時候日日大魚大肉，而家反而冇啖好食，於是就發神晦氣。

神就託摩西覆返班友，大致內容係咁：「你班友日日話要食肉，食食食食幪你好唔好？由聽日開始，你哋日日會有肉食，食到你厭，食到你由鼻哥窿噴返出嚟都食唔晒，滿意未？」（民數記/戶籍紀11:18-20）第二朝，唔知咩風就無啦啦吹咗勁多鵪鶉去以色列人紥營嘅地方，堆到一地都係，「足足三尺咁厚」。（民數記/戶籍紀11:31）

呢個故事教訓我哋唔好發神晦氣，因為神要同你認真嘅話你好大鑊。

不過故事仲可以有另一重意義：神用行動證明畀我哋睇，如果有人發你晦氣或者煩哩煩路，同佢認真其實係一個唔錯嘅解決辦法。

想知更多，不妨自己睇《出埃及記》（又譯出谷紀）同埋《民數記》（下面譯戶籍紀）。就算你既唔信神、又唔鍾意歷史，《出埃及記》當一本小說睇其實都幾好睇。有咩問題或者唔明都可以搵我，我會盡力解答。

翹